БИШКЕК, 3-фев. — Sputnik. Борбор калаада Абдрахманов менен Киев көчөлөрүнүн кесилишинде BMW, Honda Odyssey жана Toyota Camry унаалары кагышкан ири кырсык болду. Бул туурасында окуяга күбө болгон адам билдирди.
Анын айтымында, кырсыкка кабылгандардын ичинен башы жарылып, буту-колу сынган аялды Тез жардам кызматы алып кетти.
"Жашыл жарык күйүп турганда Абдрахманов көчөсү менен түндүктү көздөй бара жаткан Honda Odyssey унаасын капталдан чыга калган BMW сүзүп кетти. Экинчи автоунаа Киев көчөсүнөн кызыл жарыкка өткөн. Каттуу соккудан минивэн аңтарылып кетип, түркүккө барып урунган. Бул кагылышуудан үчүнчүсү — Toyota Camry жабыр тартты", — деп айтты окуянын күбөсү.
Honda Odyssey унаасынын ичиндеги аял жабырланып, ооруканага алып кетишкен.
Окуя болгон жерден качып кетип, бир аздан кийин келген BMW айдоочусун ал жердегилер аз жерден сабап кое жаздашты.
Тартип коргоочулар азырынча бул окуя тууралуу маалымат бере элек.
