Оюндун биринчи бөлүгүндө "Достук" командасынын оюнчусу Манас Ниязов "Бойка" бууданы менен каршылаштарынын тайказанына улак салып эсеп санын ачты. Бирок экинчи бөлүктө "Ынтымактын" улакчысы Азим Болот уулу "Геркулес" аты менен улак таштап, эсеп санын теңеп койду.
Коло байге үчүн Чүйдүн "Биримдик Аю" жана "Арашан" командалары күч сынашып, "Биримдик Аю" жеңишти камсыздады.
Мелдешке президенттик аппараттын жетекчиси Мухаммедкалый Абулгазиев, премьер-министр Сапар Исаков жана Көк бөрү федерациясынын президенти Икрамжан Илмияновдор келип, уткан командаларга сыйлык тапшырышты.
Алдыңкы орундар үчүн төмөндөгүдөй сыйлыктар ыйгарылды:
1-орун "Ынтымак" — 400 миң сом;
2-орун "Достук" — 200 миң сом;
3-орун "Биримдик Аю" — 100 миң сом;
4-орун "Арашан" — 75 миң сом.
Мыкты чабуулчу — "Достук" командасынан Манас Ниязов, 10 миң сом;
Мыкты аргымак — "Арашан" командасынан Кушчубай Илис уулунун "Телтору" аттуу бууданы, 10 миң сом.
Эскерте кетсек, былтыр да финалда Таластын "Ынтымак" менен Оштун "Достук" командалары кармашып 8:7 эсеби менен "Ынтымак" баш байгени илип кеткен. "Биримдик Аю" командасы дагы эки жыл катары менен үчүнчү орунду ээлеп жатат.
