Аталган окуу жайдын экономикадагы маалыматтык система кафедрасынын атын атагысы келбеген мугалимдеринин бири жумушка келгенде декандын бөлмөсү жабык турганын көргөнүн Sputnik Кыргызстан агенттигине айтып берди.
"Эшик ичинен жабылыптыр, ал жактан майрамдап жаткандай үндөр чыгып жаткан. Бөлмөдө кафедра башчысы менен анын аспиранттары болушу керектигин билчүмүн", — деди ал.
Кабинетине кире албаган мугалим күзөттө тургандарды чакырганда ага эшикти ачышкан.
"Столдун үстүндө эч нерсе жок экен, бирок ал жактагылардын оозунан спирт жыттанып турду. Кафедра башчысы мени кемсинтип, жумуштан алам деп коркутканда күзөттө тургандарды чакырдым. Буга чейин да талашып-тартышып жүргөнбүз, бирок кечээки окуяда мени сабап салышты. Эки аспирант мага кол көтөрдү", — деди жабыркаган мугалим.
Бишкек ШИИБдин маалымат кызматы бул фактыны тастыктап, ишти Биринчи Май РИИБдин кызматкерлери карап жатканын айтты.
Жабыркаган мугалим берген видеодо кафедра башчысын кармоо жана анын Биринчи Май РИИБинде сурак берип жатканы тартылган. Кармалган жарандын шымы эмнеге шыпырылып калганына эч ким түшүндүрмө бере элек. Экспертизанын жыйынтыгында киши мас экенин аныкталган.
Sputnik Кыргызстан агенттигинин кабарчысы кафедра башчысы менен байланышууга аракет кылды. Телефон чалганыбызда анын туугандары жооп берип, азыр ал эч кандай түшүндүрмө бере албай турганын, бир нече күндөн кийин кайтадан байланышкыла деп билдиришти.
