БИШКЕК, 26-мар. — Sputnik. Sputnik Кыргызстан маалымат агенттиги жана радиосу белгилүү жазуучу Төлөгөн Касымбековдун "Сынган кылыч" тарыхый романынын аудио версиясын шаардагы мектептер менен гимназиялардын кыргыз тили жана адабияты боюнча мугалимдерине тааныштырды.
Агенттик мындай уникалдуу долбоорду Кыргызстанда биринчилерден болуп жасаган. Ага илим чөйрөсүнүн өкүлдөрү жогорку баасын берип, агенттик Билим берүү жана илим министрлиги менен өкмөттүн ыраазычылык катын алган.
Чыгарманы үн менен коштоого, тагыраагы, аудио китепти өлкөдөгү кино жана театр жаатындагы белгилүү актерлор окуган.
"Сынган кылычты" Sputnik радиосунан аптанын беш күнүндө угууга болот, ал эми долбоор менен sputnik.kg сайтынан таанышууга мүмкүн.
"Шаардагы бардык мектептердин мугалимдеринин атынан ыраазычылык билдиребиз. Бизге өзгөчө белек тартууладыңар. Романды окууга бизге алты саат гана берилгендиктен кыйын болуп келген. Сиздер билим берүүгө жана кыргыз тилинин өнүгүшүнө чоң салым коштуңар", — деген пикирин Бишкек мэриясынын билим берүү башкармалыгынын башкы адиси Жайнагүл Сапалова билдирди.
Sputnik Кыргызстан ондогон мамлекетте мультимедиалык маалымат хабына ээ эл аралык маалымат агенттиги жана радиосунун бир бөлүмү болуп саналат.
Sputnik 30дан ашык тилде маалымат таратат.
