БИШКЕК, 28-мар. — Sputnik. Кемероводогу "Зимняя вишня" соода борборунда чыккан өрттөн көз жумган 64 маркумдун тең сөөгүн Өзгөчө кырдаалдар министрлигинин кызматкерлери таап чыкты. Бул тууралуу ведомствонун жетекчисинин орун басары Владлен Аксенов билдирди.
"Каргашадан жалпысынан 64 адам көз жумган. Алардын сөөктөрү табылды. Дайынсыз жоголгондор жок", — деди ал.
Аксенов каза болгондордун 41и балдар экенин тастыктады.
Белгилей кетсек, 25-мартта Кемерово шаарындагы "Зимняя вишня" деп аталган төрт кабаттуу соода борборунда өрт чыгып, 64 кишинин өмүрүн алды. Өрт кантип башталганы видео байкоого түшүп калган.
Бул трагедия Россиядагы эң чоң төрт өрт кырсыктын бири катары эсептелүүдө. 1999-жылы Самарада Ички иштер башкармалыгында тилсиз жоо 57 өмүрдү алып кеткен. 2007-жылы Краснодар аймагындагы карылар үйүндө чыккан өрттөн 63 киши каза тапкан. 2009-жылы Пермь шаарындагы "Хромая лошадь" клубунда чыккан өрттөн 153 адам өмүрү менен коштошкон.
