БИШКЕК, 3-апр. — Sputnik. Бишкекте маршруттук таксилер каттамга чыгып иштей баштады. Учурда шаарда кичи автобустар эл ташып жатышат. Бүгүн кечээгидей болуп аялдамада үйүлүп турган эл анча байкалбайт.
Кечээ, 2-апреде, Бишкектеги маршруттук таксилердин айдоочулары тарифти жогорулатып, жүргүнчүлөрдү милдеттүү түрдө камсыздандырууну жокко чыгаруу талабы менен иш таштап, каттамга чыккан эмес. Анын кесепетинен аялдамада кезек күткөндөр көп болуп, коомдук транспортко эл батпай калган.
Ал эми өкмөт башчы Сапар Исаковайдоочулар кандай талап коюшпасын, баары бир мыйзамдын чегинде иштөөгө милдеттүү экенин белгилеген. Ошондой эле ал айдоочулардын иш таштоосуна тиешелүү мекемелердин жең ичинен сүйлөшүлгөн коррупциялык схемалары түрткү болгонун айтып, тиешелүү жетекчилерге тапшырма берген.
