БИШКЕК, 5-май. — Sputnik. Талас шаарындагы №5 орто мектебинин 8-классынын окуучусу 3-май күнү төрөгөнүн шаардык милициядан билдиришти.
Маалыматка караганда, кыз милицияга ошол эле күнү кайрылган.
"Кыз толук болгондуктан, анын кош бойлуу экенин ата-энеси билген эмес. 3-май күнү ал өзүн жаман сезе баштаганда, ооруканага жеткиришип, дал ошол жерден кыздын толготуп жатканы билинген. Бардар үй-бүлөдө жашаган кыз бойго жете электердин иши боюнча инспекциясынын каттоосунда турган эмес. Мектепте да жакшы окучу экен", — деп айтышты милициядан.
Укук коргоо органдарынан кошумчалашкандай, Кылмыш жана жаза кодексинин 132-беренеси (Жашы жете элек адам менен жыныстык катнашта болуу) менен иш козголуп, 23 жаштагы жаран шектүү катары кармалды.
Учурда ал убактылуу кармоо жайында.
