БИШКЕК, 13-май — Sputnik. "Музейдеги түн" акциясы Бишкектен тышкары Кыргызстандын бардык аймагында өтө турганын Sputnik Кыргызстан агенттигине иш-чаранын уюштуруучусу Чолпон Тентиева айтып берди.
Дубандарда акция 20-май күнү саат 18.00дөн 22.00гө чейин өтсө, Бишкектегиси андан эки күн мурункуга пландаштырылган.
"Музейдеги түн" өтчү жерлер:
— Оштогу "Сулайман-тоо" улуттук тарыхый-археологиялык музей комплекси;
— Таластагы "Манас-Ордо" улуттук комплекси;
— Баткен облустук драма театры;
— Жалал-Абадда "Билимкана" галереясы;
— Ысык-Көлдө Кажы-Сай айылындагы Shygaev museum заманбап искусство музейи;
— Ысык-Көлдөгү Сары-Ой айылында жайгашкан Курманжан датка атындагы көчмөн цивилизация борбору;
— Нарында облустук тарыхый-этнографиялык музей.
Быйылкы жылы аталган акция Кыргызстанда бешинчи ирет өтөт. Салтка айланган программа кызыктуу долбоор жана инсталляциялар менен толукталмакчы.
