Баткен: 16 жаштагы кызын зордуктап жүргөн. Шектүү Россиядан алып келинди

БАТКЕН, 22-май – Sputnik. 16 жаштагы кызын зордуктоого шектелип, издөөгө алынган Баткен облусунун 44 жаштагы жашоочусу Россиянын аймагында колго түшүрүлүп, өлкөгө алып келинди. Бул тууралуу облустук милициядан билдирди.

Ага ылайык, учурда шектүү Баткен облустук ички иштер башкармалыгынын убактылуу кармоочу жайына киргизилди.

"Шектүүгө карата буга чейин Кылмыш жаза кодексинин 129-беренесинин негизинде кылмыш иши козголгон болчу. Тергөө иштери аяктап, соттун кароосуна өткөрүлдү. Бирок шектүүгө карата соттун чечими чыга элек. Ал 16 жаштагы кызын эки жыл бою зордуктап жүргөн делүүдө", — деп айтылат билдирүүдө.

Мекеменин маалыматына ылайык, Баткен облусунун жашоочусу 40 жаштагы эне бутуна протез салдыруу максатында Бишкек шаарында узак убакыт ооруканада болгон. Ал үйдө жоктугунан пайдаланган ата 16 жаштагы кызын күчүктү таштап келебиз деген шылтоо менен ээн талаага алып барган. Кызына күч колдонуу менен зордуктап, окуя тууралуу ооз ачпоону эскертип коркуткан.

Кыздын өз атасынан боюна бүтүп калгандыгы тууралуу жакындары билген соң шектүү изин жашырып качып кеткен. 7 айлык кош бойлуу кезинде дарыгерлер кызды жасалма жол менен төрөтүшкөн. Окуя тууралуу милицияга кабар берилип, ага издөө жарыяланган.