Sputnik Кыргызстан агенттиги бул ирет калаа тургундарынын жардамы менен айрым дарыгерлердин кыжырга тийген учурларын тизмектеп чыкты.
Кайдыгер дарыгерлер. Жаның кыйналып, эптеп ооруканага келсең "тиги документти бүтүр, буга кол койдур" деп сени көрбөй эле сырттан чыгарып жиберген ак халатчандар аман болсун. "Чыдабай жатам, карап берип коюңуз" деп кайрылсаң "азыр өлбөйсүң" деп басып кеткенде айтарга сөз гана таппай каласың да. Адам өмүрү буларга эмне оюнчук болуп калганбы?…
Эки жүздүүлөр. Чөнтөгү калыңыраак адам кайрылса, алды артынан түшүп оорубаган жагын да карап ийишет. Кокус акчасы жок, айылдан келген же жупуну кийинген бирөө барып калса, кагып-силкип "ушундай абалга келгиче жүрө бердиңби, эртең кел, бүрсүгүнү кел" деп керсейип коет. Кесибине таянып өзүн Кудай сезип алгандар жанды гана кашайтат го, чиркин!
Кезек күттүргөндү жакшы көргөндөр. Бир бейтапты "10 саат" карайт. Шашпай караганы деле жакшы деңизчи, бирок айрымдары жөн эле жомок айтышып отуруп алат. Анан калса иш бөлмөсүн бекитип "жоголуп" кетет. Анысы аз келгенсип тааныштарын кезекке карабай алып кирип кеткенде, каның кайнабай койбойт экен.
Орой дарыгерлер. Буларга "бир жерим ооруп атат" деп айткандан коркосуң. Ооруп жаткан адамга жакшы сөздөн өтөр дары жок эмеспи, бирок мындай урушчаак, орой ак халатчандар адамды айыктырмак тургай кайра оорутат. Дарыгер деген кичине боорукер болгону жакшы го.
