БИШКЕК, 12-июн. — Sputnik. АКШнын президенти Дональд Трамп Түндүк Кореяга карата киргизилген 300 позиция боюнча санкциялар токтотулганын айтты. Бул тууралуу РИА Новости агенттиги жазып чыкты.
"Менде 300 санкция бар болчу", — деп Трамп маалымат жыйында журналисттерге билдирген. Ал өз сөзүндө эми аларды киргизүүдөн баш тартканын, анткени "сыйлабастыкка" жатарын белгилеген.
"Бирок биз санкция киргизүү мүмкүнчүлүгүн жоготпойбуз", — деп Трамп сөзүн улады.
Трамп журналисттин суроолоруна жооп берип жатып, Пхеньян менен дипломатиялык мамиле курууга даяр экенин, бирок ал "дароо эле" болуп кетпей турганын билдирди.
Түндүк Корея менен АКШнын лидерлери Сингапурда өткөн саммиттин жыйынтыгында жыйынтыктоочу документке кол койду. Келишимге ылайык, Трамп Түндүк Кореяга коопсуздукту кепилдөө милдетин алган. Өз кезегинде Ким Чен Ын Корея жарым аралында өзөктүк куралдан толук баш тартууга даяр экенин белгилеген.
Эки тарап ошондой эле тышкы иштер министрлеринин деңгээлинде жолугушуу өткөрүү милдетин алышкан. ТИМ башчылары саммитте жетишилген келишимдерди ишке ашырууну талкуулашат.
Тарыхый жолугушууга даярдыктар быйыл жаздан тарта башталган. Жолугушуунун ишке ашышын Түндүк Корея менен Түштүк Кореянын лидерлеринин жолугушуусу жана АКШнын мамлекеттик катчысы Майк Помпеонун Пхеньянга болгон сапары илгерилеткен.
