БИШКЕК, 20-июн. — Sputnik. Улуу Ата Мекендик согушта курман болгон жана дайынсыз деп эсептелген кыргыз жоокери Балтабай Борошевдин жеке буюмдары уулу Жээнбай Балтабаевге өткөрүп берилгенин президенттин маалымат кызматы кабарлады.
Билдирүүдө өлкө башчы Сооронбай Жээнбеков 14-июнда Москвага болгон иш сапары учурунда "Обелиск" деп аталган издөө отрядынын өкүлдөрү менен жолукканы айтылат.
"Алар президентке Ош облусунун Алай районунан Улуу Ата Мекендик согушка аттанган жана майданда дайынсыз болуп кеткен Балтабай Борошевдин 2006-жылы табылган жеке буюмдарын өткөрүп беришкен", — деп айтылат маалыматта.
Кыргыз жоокердин сөөгү Смоленск облусундагы Бекрино айылынын жанынан табылып, Овсянники айылындагы Эскерүү талаасына кайрадан коюлган.
Ал 20-июнда өкмөттүн Ош облусундагы өкүлү Таалайбек Сарыбашовдун катышуусу менен жоокер Балтабай Борошевдин медальонун, кемер куру жана "Өлбөстүккө кадам" ("Шагнувши в бессмертие") медалын анын уулу Жээнбай Балтабаевге тапшырып берди.
Жоокердин уулу Улуу Ата Мекендик согуш жылдары курман болгон кыргызстандыктардын ысымдарын түбөлүккө калтыруу маселелерине көңүл буруп жатканы үчүн президентке жана "Обелиск" издөө отрядынын өкүлдөрүнө ыраазычылык билдирди.
