БИШКЕК, 10-июл. — Sputnik. Чүй облусунун Москва районундагы КСДП партиясынын мүчөлөрүбүз деген жарандар жыйын өткөрүп, Алмазбек Атамбаевди партиянын төрагалыгынан түшүрүү маселесин карашты. Андан сырткары партиянын 31-мартта болгон акыркы съездине чакырылган делегаттар туура эмес тандалган, коррупция өлкөдө гүлдөп-өнүгүүдө, азыр жалаң прокурорлор пара менен кармалып жатат дешти. Бул боюнча социалдык тармакка жайгаштырылган видеодо айтылат.
Жыйынга катышкандар партиянын съездине Атамбаевдин өздөй кишилери гана чакырылып, ал мыйзамсыз түрдө төрага болуп шайланган деген пикирлерин билдиришти. Андан сырткары орун басарлыкка партияга мурда мүчө болбогон Сапар Исаковду шайлап алышы да партиянын уставына жооп бербейт дешкен.
Ал арада Кыргызстан социал демократиялык партиясынын (КСДП) расмий өкүлү Кундуз Жолдубаева Беловодское айылында болгон жыйын мыйзамсыз экенин айтты. Партиянын аймактагы жыйындарын өткөрүү үчүн райондук координатору же КСДПнын катчылыгы менен макулдашуу болбогонун кабарлады. Андан сырткары, партиянын райондогу бөлүмдөрү бир канча жыл мурда жоюлуп кеткен деген маалымат берди.
Жолдубаева учурда бийликке жагыныш үчүн керек болсо энесин сатууга даяр болгондор бар деген пикирин айтты.
"Айрым кишилер КСДПга бийлик, мансап үчүн келишкен. Ошол эле Сагынбек Абдрахманов "Ар-Намыстан" келген. КСДПдан Алмазбек Атамбаевдин жардамы менен Жогорку Кеңешке депутат, губернатор жана "Кыргызалтындын" ишканасынын жетекчи орун басары болуп иштеди. Тилекке каршы, Москва районундагы КСДПнын мүчөлөрүнүн арасында "ушундай экземплярлар" бар. Азыр аларга бир нерсе жасап беребиз деп сөз беришкен, ошону аткарып жатат", — деди Жолдубаева.
Жолдубаева, андан сырткары, Москва районунда партиянын билетин алган болгону 80 киши бар экенин белгиледи.
Эске салсак, июнь айынын башында КСДПнын мурдагы мүчөсү Сагынбек Абрахманов партия жакында чукул жыйынга чогулуп, анда Алмазбек Атамбаевди төрагалыктан алуу маселеси карала турганын айткан болчу.
