Журналистика факультетинде окуган студент оюн эркин айтышы керек. Эгер ал өз пикирин түшүнүктүү кылып айта албаса, анда ал коомдогу болуп жаткан окуяларды да элге толук кандуу жеткире албайт. Мындай пикирин Молдосеит Мамбетакунов Sputnik Кыргызстан радиосунун "Ийгилик сырлары" уктуруусунда сүйлөп куруп жатып билдирди.
Анын айтымында, журналистика факультетин аяктап, бирок кесиби боюнча иштебей калуунун үч фактору бар.
"Биринчиден, маянанын аздыгынан улам аталган факультеттин бүтүрүүчүлөрү окуу жайды аяктагандан соң башка тармакта иштеп калат. Жаш адистер үй алып, үйлөнүп, үй-бүлөсүн багыш керек эмеспи. Мындан улам алар акча көбүрөөк тапкан тарапка ооп кетишет. Экинчиси — адашып ушул бөлүмгө тапшырып алгандар. Азыркы жаштардын көпчүлүгү дароо эле мектепти аяктап атактуу болууну каалайт. Телевидениеге чыгып алып баруучу, диктор болуп элге таанымал болуу максатында ушул бөлүмгө тапшырып, бирок жыйынтыгы ойдогудай болбой калып, алар да журналистиканы таштап коюшат. Ал эми үчүнчү фактор болсо студенттер психологиялык жактан өзүнүн оюн эркин айта албай, бул кесип менен коштошууга аргасыз болот. Ошондуктан журналист болом деген жаштар коомго пикирин жеткиргенди билиши шарт", — деди Мамбетакунов.
Ал ЖМКлар алдыңкы планга саясатты эмес, экономиканы алып чыгышы керектигин кошумчалады.
