Улуттук статистикалык комитет Кыргызстанга кайсы өлкөнүн эли көп келерин тактады. Мекеменин маалыматына ылайык, 2017-жылы жалпы 4,7 миллион чет өлкөлүк жаран чек араны кесип өткөн. Анын 2 миллионго жакыны Казакстандын жарандары. Өзбекстан бул жылы Россияны артка калтырып экинчи орунга илинген. Былтыр коңшу мамлекеттен Кыргызстанга 480 миң киши келген. Үчүнчү сапка илинген Россиядан бир жылда өлкөгө 471 миң киши кирген. Тажикстандан 250 миң адам келип төртүнчү орунга илинсе, бир жылда Түркиядан 54 миң, Кытайдан 40 миң жаран келген. Кызыгы, акыркы беш жылдын ичинде Кыргызстанга Индия менен Түштүк Кореядан келген жарандардын саны көбөйгөн.
