БИШКЕК, 6-сен. — Sputnik. Брюс Линин трюктарын жасаган сегиз жаштагы Нурмухаммед Ташмаматов Украинадагы "Круче всех" (Бардыгынан кыйын) балдар шоусуна катышып жатат. Бул туурасында Sputnik Кыргызстан маалымат агенттигинин кабарчысына баланын атасы Асылбек Урманов билдирди.
"Круче всех" программасы Украинанын Интер телеканалында көрсөтүлөт. Анда жеткинчектер ар тараптан талантын тартуулайт. Долбоордун жаңы сезону келе жаткан ишембиде башталат. Программаны белгилүү алып баруучулар Андрей Доманский менен Андрей Данилевич тизгиндейт.
Нурмухаммеддин атасынын айтымында, долбоорго катышуу үчүн арыз июндун соңунда жөнөтүлүп, бир нече жумадан кийин телеканалдын өкүлдөрү байланышка чыккан.
"Биз тартуу иштери үчүн августтун ортосунда учуп барганбыз. Нурмухаммед Кумири Брюс Лиден сырткары, Жан-Клод Ван Даммдын да трюктарын көрсөтүп берди. Ошондой эле алып баруучулар уулум тартылган тасманы көрсөтүштү. Анын өнөрү бардыгына жакты", — деди баланын атасы.
Ал ортодо Интер телеканалы өзүнүн YouTube-каналына Нурмухаммед катышып жаткан телешоунун анонстук ролигин жарыялаган.
Кыргызстандык жаш "Брюс Ли" интернетке тараган видеосу менен элге таанылган, анда ал нунчактар менен өнөрүн көрсөткөн. Кийинчерээк ал үч жашынан тарта каратэ менен машыгып, сары кызыл курга ээ экендиги белгилүү болгон.
Ал ошондой эле Россиянын Биринчи каналындагы Максим Галкиндин шоусунда элди таң калтырган видеосун материалдан көрүңүздөр.
