БИШКЕК, 26-сен. — Sputnik. Президент Сооронбай Жээнбеков Бириккен Улуттар Уюмунун жыйынында сүйлөп жатып, акыркы он жылдагы Борбор Азиядагы суу-энергетикалык ресурстарды пайдалануу практикасы жаңы ыкмаларды иштеп чыгуу зарылчылыгын көрсөтүп жатканын айтты. Бул тууралуу өлкө башчысынын маалымат кызматы билдирди.
Жээнбеков өз сөзүндө Кыргызстан үчүн сууну пайдалануу маселелери өтө маанилүү экенине токтолду.
"Борбор Азиядагы суу-энергетикалык ресурстарды комплекстүү пайдалануу региондогу бардык мамлекеттерди туруктуу өнүктүрүүгө багытталган чаралардын системасы менен аныкталышы керек. Ошондуктан Кыргызстан Борбор Азияда бул чөйрөдө экономикалык жактан өз ара пайдалуу механизмдерди иштеп чыгууну жана ишке киргизүүнү жактайт", — деди президент.
"Бул контекстте биз ошондой эле КМШ, ШКУ, ЖККУ жана ЕАЭБ сыяктуу регионалдык бирикмелердин да өзгөчө ролун жана жаңы миссиясын көргүбүз келет. Бүгүн обочолонуу саясатын жеңип чыгуу жана кызматташтык менен өнөктөштүк векторлорун өнүктүрүү өтө орчундуу болуп турат", — деди өлкө башчысы.
Сооронбай Жээнбеков Бириккен Улуттар Уюмунун жыйынында, Кыргызстандагы саясий жана социалдык абалга токтолгон болчу.
