Таймырдын Дудинка шаарындагы кыргыздар атайын Кыргызстандан боз үй алып барып эгемендүүлүк майрамын белгилешти. Бул туурасында 14 жылдан бери ал жакта иштеп жүргөн Рустамбек Жаналиев Sputnik Кыргызстан радиосуна маек берип жатып билдирди.
Анын айтымында, боз үйдү кыргыздардан бир өкүлү менен Дудинка шаарындагы элдик чыгармачыл борборунун директору чогуу алып кеткен.
"Атайын долбоор жазып шаар бийлигине Кыргызстандан боз үй алдырууну сунуштап, бир миллион сомдой бөлүндү. Боз үйдү Ысык-Көлдүн Түп районундагы устадан сатып алышкан. Аны Foton үлгүсүндөгү жүк ташуучу унаасына сандык, кийим-кече, дасторкон, идиш-аяк иши кылып кыргызга тиешелүү нерсенин баарын жүктөп жөнөтүшкөн. Бишкектен Красноярскиге төрт суткада жетиптир. Андан бери кемеге салып жалпы жонунан бир ай жол жүрүп алып келди. 31-августта анын ачылышын өткөрдүк. Жергиликтүү бийлик өкүлдөрү жана беш шаардан 300дөй мекендешибиз келди. Жалпы 1500гө чукул адам катышты", — деди Жаналиев.
Рустамбек Жаналиев менен болгон маектин толук вариантын Sputnik Кыргызстан агенттигинин материалынан окуңуздар.
