БИШКЕК, 27-окт. — Sputnik. Ноокат районундагы Камбаралы Бобулов атындагы мектептин "Үч жарык" командасы жол кыймыл боюнча жаш инспекторлорунун мамлекет аралык сынагында I орунга ээ болду. Бул тууралуу Жол кыймылынын коопсуздугун камсыздоо боюнча башкы башкармалыгынан (ЖКККББ) билдиришти.
Иш-чара Россиянын Краснодар аймагынын Анапа шаарында өткөн. Конкурска жалпысынан 50 команда катышкан.
Мамлекет аралык сынакка Кыргызстан, Азербайжан, Казакстан, Белоруссия, Тажикстандын мектеп окуучулары катышкан. Жыйынтыгында Ош облусунун Ноокат районундагы Камбаралы Бобулов атындагы мектептин 8 окуучудан турган "Үч жарык" командасы мыкты деп табылган.
"Конкурстан программасы бир нече этаптан тургандыктан балдар көп убакыт даярданды. Ноокаттык окуучулар жол кыймылынын эрежелерин сактоону артисттик менен, башкача айтканда ыр, бий, теардык сценалар менен мыкты көргөзүп беришти", — деп айтылат маалыматта.
Мындай иш-чаранын максаты — жол кырсыктын кесепетинен жаш балдарды сактоо, аталган көйгөйгө мекеме, уюмдарды, деги эле коомчулукту көңүл бурдуруу деп айтышты башкармалыктан.
Маалыматка ылайык, конкурстун алкагында аталган кызматтын адистери тарабынан семинар, жыйын, тегерек үстөл, мастер-класстар өткөрүлүп, КМШ өлкөлөрүндөгү кызматкерлердин ортосундагы мамилени чыңдоо боюнча сүйлөшүүлөр жүргүзүлдү.
