Кыргыз-казак чегиндеги Чалдыбар көзөмөл-өткөрүү пунктунда жарык өчүп, эл көчөдө эки саат турууга аргасыз болду. Бул тууралуу Sputnik Кыргызстан агенттигине күбө жеринен билдирди.
Анын айтымында, жакын жердеги кафеде жарык күйүп турган, чек ара пунктунда гана өчүк болгон. Муну кесепетиненен документтерин текшерүүгө мүмкүн болбой, жарандар Казакстан тарапка өтө албай калышкан.
Бул боюнча Чек ара кызматынын маалымат кызматы түшүндүрмө берип, трансформатордогу авариядан улам жарык өчүп калганын айтты.
“Пункттун алдында 30га чукул киши күтүп турду. Өтө көп чогулган жок. Анын баары 15 мүнөттүн ичинде чек ара көзөмөлүнөн өтүп бүтүшөт”, — деп айтылат маалыматта.
Азыркы тапта кырдаал жөнгө салынып, иш кайра жанданганын белгилешти.
