БИШКЕК, 19-дек. — Sputnik. Бишкекте укук коргоочулар ичимдик ичип бөтөлкөсүн коомдук жайга ыргыткан эки кишини жазалады. Бул тууралуу шаардык ички иштер башкармалыгынан кабарлашты.
Буга чейин Бишкектеги 9-кичирайондогу короолордун бириндеги видеокамерага ичимдик ичкен кишилер бөтөлкөлөрдү балдар аянтчасына ыргытып салганы тартылып калган. Тасманы редакцияга жергиликтүү тургундардын бири берген.
Тагыраагы, 31 жаштагы С.У. аттуу киши Административдик кодекстин 366-беренесине ("Ичимдик ичип же мас абалда коомдук жайларда жүрүү") ылайык, 1000 сом айыпка жыгылды. Ал эми А.Э. аттуу жаранга 489-берене ("Уруксат берилбеген жерге таштанды ыргытуу, өрттөө") боюнча 2000 сом айып салынды. Ошондой эле анын иши Октябрь райондук администрациясынын атайын комиссиясынын кароосуна жөнөтүлдү.
