Жумгалда 4 жашар кыз зордукталып, жети жашар бала менен аял муунтуп өлтүрүлгөн

БИШКЕК, 22-дек. — Sputnik. Нарын облусунун Жумгал районунун Көк-Ой айылында 47 жаштагы аял жана анын эки небереси өлтүрүлүп, өрттөлгөн. Бул тууралуу ИИМдин маалымат кызматы кабарлады.

Билдирүүгө ылайык, 21-декабрь күнү Жумгал райондук нөөмөт бөлүмүнө "Көк-Ой айылында өрт чыгып, бир үй-бүлө каза болуптур" деген маалымат түшкөн.

Ыкчам тергөө тобу окуя болгон жерге чыгып, алгачкы иликтөө иштерин жүргүзүү учурунда аталган айылдагы үйлөрдүн биринде чыккан өрттөн каза болгон 47 жаштагы аялдын жана анын эки небересинин — 4 жана 7 жаштагы балдардын сөөгү табылган. Аталган факт боюнча Жумгал райондук ички иштер бөлүмү тарабынан соттук-медициналык, биологиялык, химиялык, гистологиялык, дактилоскопиялык, криминалистикалык, медициналык экспертизалар дайындалган.

"Алгачкы тергөөнүн жүрүшүндө 47 жаштагы аял менен анын жети жаштагы небереси муунтуп өлтүрүлгөнү, ал эми төрт жаштагы кыздын зордукталгандыгы аныкталган", — деп жазылат маалыматта.

Аталган факты боюнча Жумгал райондук ички иштер бөлүмү тарабынан Кылмыш-жаза кодексинин 97-беренеси ("Адам өлтүрүү") боюнча иш козголду.

Жүргүзүлгөн ыкчам иликтөө иштеринин натыйжасында кылмышка шектүү катары Көк-Ой айылынын 29 жаштагы тургуну кармалып, күнөөсүн толугу менен мойнуна алып көрсөтмө берген.

Шектүүнүн айтымында, ал 47 жаштагы аял менен 20-декабрда түнкү саат 11лерге чейин спирт ичимдигин ичкен.

"Аял мас болуп калганда үйдүн төркү бөлмөсүнөн уйкудан ойгонуп калган төрт жашар кызды күч колдонуп зордуктаган. Жанында уктап жаткан жети жаштагы бала ойгонуп кеткендиктен аны колу менен муунтуп өлтүргөн. Андан соң кызды да тумчуктуруп өлтүрүп, кийин конок бөлмөдө мас абалында уктап жаткан аялды да муунтуп салган. Кылмышты жашыруу максатында бөлмөдөгү мештин ичинен чокторду алып, бөлмөнүн ар кай бурчтарына от коюп качып кеткен", — деп жазылат маалыматта.

29 жаштагы жаран Жумгал райондук ИИБинин убактылуу кармоочу жайына киргизилди. Учурда тергөө иштери жүрүүдө.