БИШКЕК, 2-янв. — Sputnik. Магнитогорск шаарында кырсыктан кулаган үйдүн урандысынан табылган наристенинин жашоосуна коркунуч жок. Бул туурасында Россиянын саламаттыкты сактоо министри Вероника Скворцованын сөзүнө таянып РИА Новости билдирди.
"Азыр абалы дагы деле оор, бирок туруктуу. Өткөн түндө дарыгерлер анын өмүрүн сактап калуу үчүн абдан көп иш жасашты. Азыр наристенин жашоосуна коркунуч жок", — деди министр.
Скворцованын айтымында, учурда баланын жанында апасы бар. Аны менен психологдор иштеп жатат.
Ал эми кечээ куткаруучулар урандылардын алдынан 1,5 сутка жаткан баланы таап, сууруп чыгышкан.
Бөбөккө жергиликтүү ооруканада жардам көрсөтүлгөн соң, дароо учак менен Москвадагы Рошаль атындагы Балдар хирургиясы жана травматологиясы боюнча улуттук илим изилдөө институтуна алып келишкен.
