БИШКЕК, 14-янв. — Sputnik. Айлана-чөйрөнү коргоо жана токой чарба мамлекеттик агенттиги 2 миллион 280 миң сомго 8 даана көп функционалдуу учуучу аппарат (дрон) сатып алды. Бул тууралуу агенттиктин маалымат кызматынан кабарлашты.
Билдирмеге караганда, 2018-жылы чыгарылган дрондордун техникалык абалы мыкты. Алардын жардамы менен браконьерлерди аныктоо, зыянкеч курт-кумурскалар менен күрөшүү жана токойдогу өрттү алдын алуу пландалууда.
"UPAIRONEPLUS үлгүсүндөгү квадрокоптер менен WFTO9SII үлгүсүндөгү октокоптер Кытайдан алынды", — деп айтылат маалыматта.
Октокоптер — токойлорду зыяндуу курт-кумурскалардан сактоо үчүн колдонулат. Аппарат 10 килограммга чейинки жүктү көтөрөт. Канаттарынын узундугу 1,5 метрди түзүп, мүнөтүнө 0,4 литр препаратты чачууга жөндөмдүү.
"Кыргызстан КМШ өлкөлөрүнүн ичинен биринчилерден болуп ушундай дронго ээ болду. Учурда агенттикте 12 даана көп функционалдуу учуучу аппарат бар", — деп маалымат кызматы белгиледи.
Дрон абада 30 мүнөт жүрө алат. Спорттук режимде саатына 72 чакырымды багындырат. Ошондой эле системанын жардамы менен тоскоолдуктарды өз алдынча буйтап өтүүгө жөндөмдүү.
