Кыргызстанда футболдун өнүгүшү үчүн атаандаштык пайда болушу керек. Азыркы ойноп жүргөн төрт команда менен алыска бара албайбыз. Мындай пикирин "Дордой" ассоциациясынын президенти Аскар Салымбеков Sputnik Кыргызстан радиосунун эфиринде маек куруп жатып билдирди.
Анын айтымында, эми Азия кубогунан кийинки эйфорияга чекит коюп, футболду өнүктүрүүгө көңүл буруу керек.
"Азия кубогунда Кыргызстандын футбол боюнча улуттук курама командасы кыргыз футболунун келечеги бар экенин көрсөттү. Бардыгыбыз балдардын оюнуна маашырланып эле эйфорияда жүрөбүз. Эми келечекти ойлошубуз керек. Мамлекетти карап эле отура берген болбойт. Мен жергиликтүү чоң-чоң ишканаларды, байланыш тармагындагы, алтын, кен казган компанияларды өздөрүнүн жеке футболдук командаларын түзүп, клубдарды ачууга чакырат элем. Жарнамага деле акча коротуп жатышпайбы. Андан көрө футболго көңүл бурса, жарнама эле эмес, өлкө үчүн, жаштар үчүн да пайдалуу иш кылышкан болор эле. Биз кыргыз футболунда атаандаштык жаратуу менен гана дүйнөлүк деңгээлге багыт ала алабыз", — деди Салымбеков.
Ал ошондой эле район, облус жетекчилери да футболдун өнүгүүсүнө шарт түзүүгө кызыкдар болушу керектигин кошумчалады.
