БИШКЕК, 15-фев. — Sputnik. Австралиядагы суу ташкындан жарым миллиондой бодо мал өлгөнүн CNN телеканалы билдирди.
Апта башында Квинсленд штатына нөшөрлөп жамгыр жааган. Бир нече күндө эле бир айлык нормадагы жаан жаап, аймактын көпчүлүк аймагын суу каптаган.
Акыркы маалыматтарга ылайык, жаратылыш кырсыгынан 500 миңге жакын бодо мал өлгөн. Алардын баасы 213 миллион доллар деп бааланууда.
Квинсленд штатынын премьер-министри Анастасия Палащуктун билдиришинче, аталган аймакта көптөн бери кургакчылык өкүм сүрүп, суу ташкындан кийин бул жер алааматка айланган. Мындай көрүнүш буга чейин такыр болгон эмес.
Квинсленд аймагында бодо мал багуу менен алектенген AgForce уюмунун аткаруучу башкы директору Майкл Гериндин айтымында, эми фермерлер ишин жөнгө салып кетиши үчүн ондогон жылдар керектелет.
"Бир нече жыл кургакчылыктан кийин болгон мындай сокку жүз миңдеген малдын башын алды, ал бир гана фермерлерге эмес, айылдагы бирикмелерге да чоң жоготуу алып келди. Айрым фермерлер бардыгынан кол жууду", — деди ал.
Учурда өлгөн малды көмүү боюнча көйгөйлөр чыгууда. Анткени көмүлбөгөн мал таза сууга терс таасирин тийгизүүдө.
