БИШКЕК, 15-фев. — Sputnik. Кыргызстандык режиссер Актан Арым Кубаттын "Бешкемпир" фильми Францияда өткөн Азия тасмалары фестивалында дагы бир ирет көрсөтүлдү. Бул тууралуу продюсер Алтынай Койчуманова билдирди.
Фестиваль 5-12-февраль күндөрү 25-жолу Везуль шаарында өттү.
Юбилейлик датага карата уюштуруучулар мурдагы жылдары көрсөтүлгөн сүймөнчүк тасмалардын бирин программага кошо алмак.
"Уюштуруучулар Актан Арым Кубаттын "Бешкемпир" тасмасын тандап алышты. Негизи бул фильм аталган фестивалдын алкагында үчүнчү ирет көрсөтүлүп жатат. Алгачкы жолу 2000, андан соң 2002-жылы тартууланган. Ошого карабай француз кино сүйүүчүлөрү белгиленген эки сеанстын тең билетин талап кетип, үчүнчү сеансты уюштурууга туура келди", — деп айтылат билдирүүдө.
Мындан тышкары, "Кентавр" Франциянын 30дан ашуун шаарында прокатка чыгып, элдин сүймөнчүлүгүнө ээ болгон.
Азия тасмалары фестивалы - Европада 1995-жылдан бери өткөрүлүп келген эң кадырлуу иш-чаралардын бири. Жыл сайын анда 90дон ашуун тасма көрсөтүлүп, 30 миңдей көрүүчү болот.
