БИШКЕК, 20-фев. — Sputnik. "Ак Шумкар" өзгөчө белгисин жасоого 85 миң сомдун айланасындагы каражат кетет. Бул тууралуу президенттин алдындагы мамлекеттик сыйлыктар боюнча комиссиянын жооптуу катчысы Жылдыз Сманбаева Жогорку Кеңештин жалпы жыйынында билдирди.
Бүгүн депутаттар "Кыргыз Республикасынын мамлекеттик сыйлыктары жана ардак наамдары жөнүндө" мыйзамына өзгөртүү киргизүү тууралуу" мыйзам долбоорун талкуулашты. Ал биринчи окууга киргизилүүдө.
"Кыргыз Республикасынын Баатыры" деген наамга татыган адамга "Ак Шумкар" өзгөчө белгиси тапшырылат. Адам каза болгон күндө наам анын мураскерине берилип, бирок тагынып жүрүүсүнө тыюу салынат.
"Кыргыз Республикасынын Баатыры" наамы биринчи жолу 1997-жылы берилген. Ошол күндөн бери 24 киши бул жогорку ардак наамга татыган.
