БИШКЕК, 27-мар. — Sputnik. Россия тарап Кыргызстанда Михаил Ломоносов атындагы Москва мамлекеттик университетинин (МГУ) филиалын ачууну эмне үчүн көздөп жатканын аталган окуу жайдын ректору Виктор Садовничий түшүндүрүп берди.
Белгилей кетсек, Садовничий Кыргыз-орус жогорку окуу жайларынын ректорлорунун Бишкекте өтүп жаткан I форумуна катышууда.
Буга чейин ал Кыргызстанда МГУнун филиалын ачууга алты ирет макулдугун бергенин айтып, бирок Кыргызстандын билим берүү жана илим министри Гүлмира Кудайбердиева бул маселе боюнча "эч нерсе айта албасын" билдирген.
"Негизги максатыбыз — келечектеги элитаны даярдоо. Башка табаар пайдабыз жок. Бул биздин ак дилибиз менен кылган ишибиз", — деди Садовничий.
Өзүнүн айтымында, Кыргызстанга болгон бул жолку сапарында МГУнун ачылышын каалагандар чындап көбөйгөнүн байкаган.
Ушул тапта Москва мамлекеттик университетинин филиалдары алты мамлекетте иштеп жатат.
Ал эми Кыргызстанда эки өлкөнүн катышуусу менен ачылган бир окуу жай бар, ал Кыргыз-Россия Славян университети.
Россияда быйыл канча кыргызстандык жогорку билим алып жатканына кызыксаңыз, РФтин илим жана жогорку билим берүү министри Михаил Котюков берген маалыматты окуп коюңуз.
