БИШКЕК, 3-апр. — Sputnik. Свердлов РИИБинин кызматкерлери беш кишини кармады. Алардын тамашасынын айынан Бишкекте "Перехват" планы жарыяланган болчу. Бул тууралуу Бишкек ШИИББден кабарлашты.
Шейшемби күнү кечинде Sputnik агенттигинин укук коргоо органдарындагы ишенимдүү булагы 1-апрель күнү саат 22:45те Чүй проспектиси менен Гоголь көчөсүнүн кесилишинде белгисиз адамдар жигитти автоунаага күчтөп салып кеткенин билдирген.
Окуянын күбөлөрү милицияга чалып адам уурдалганын билдиришкен. Укук коргоо органдары окуя болгон жерге келип, жигитти Mercedes-Benz үлгүсүндөгү күмүш түстүү унаага салып кетишкенин аныкташкан. Окуя видеого түшүп калган.
Кийинчерээк ШИИББдин маалымат кызматы кишилер бул окуяны 1-апрелде тамашага салабыз деп жасашкандыгын билдиришкен.
Бүгүн, 3-апрелде, Бишкек шаарынын ички иштер башкы башкармалыгы факт Жоруктардын жана кылмыштардын бирдиктүү реестрине Кылмыш жаза кодексинин 170-беренеси ("Адам уурдоо") боюнча каттоого алынганын кабарлады.
"Бишкек боюнча "Перехват" планы жарыяланып, ШИИБдин тийиштүү кызматтары ишке киришкен. Свердлов райондук милициясынын Криминалдык кызматы ыкчам издөө аракеттерин баштаган", — деп айтылат маалыматта.
Тартип сакчылары кармалгандардын ким экенин аныктады. Алардын төртөө 17 жашта болсо, бирөө 18де. Милициядан билдиришкендей, балдар көчөдөгү адамдарды тамашага салыш үчүн ушундай кадамга барышкан. Учурда Свердлов РИИБи тергөө амалдарын улантууда.
