БИШКЕК, 7-май — Sputnik. Салыктан буйтады делген Жалил Атамбаев журналист Ыдырыс Исаковго койгон доосун артка чакыртып алды. Бул туурасында анын жактоочусу Шумкар Абдыжапаров билдирди.
Анын айтымында, Атамбаев журналистти кечирип, биринчи кадам таштоо ниетинде доосунан баш тарткан.
"Бүгүн эртең менен Ош шаардык сотуна барып арызыбызды кайтарып алдык. Ыйык Орозо айында кечиримдүү бололу, башкаларга үлгү болсун деп биз биринчи кадамды таштадык. Айтылган жүйөлөрдү сотко келип далилдеп берсин деп даттанганбыз. Ага жалаа жаап, ар-намысына шек келтиргени үчүн моралдык чыгым катары 50 миллион сом сураганбыз. Бирок Жалил Атамбаев журналистти кечиргенин айтты", — деди жактоочу.
Белгилей кетсек, журналист Ыдырыс Исаков Ош шаарында ишкерлик менен алектенген Жалил Атамбаев тууралуу "Салыктан буйтаган ишкерлер" деген темада иликтөө даярдаган. Андан соң Атамбаев Ош шаардык сотуна кайрылып, журналистти 50 миллион сомдук доого жыгууну сураган. Бул медиа коомчулугунун нааразычылыгын жараткан.
