Тажикстан: түрмөдөгү козголоңдо 29 кылмышкер каза болду

БИШКЕК, 20-май — Sputnik. Тажикстандын түрмөсүндө "Ислам мамлекети" террордук уюмунун мүчөсү деп камалгандар түндө козголоң чыгарып, үч кайтаруучуну өлтүрүштү. Бул туурасында Тажикстандын Юстиция министрлигинин маалымат кызматына таянып РИА Новости билдирген.

Андан сырткары, абактагы 29 киши каза тапкан.

Бунт Душанбеге жакын жайгашкан Вахдат шаарында болгону айтылат.

"Жергиликтүү убакыт менен алганда болжол менен 20.30дарда түрмөдө отургандардын ичинен бычак менен куралданган 30га чукул адам үч кайтаруучуну барымтага алып, андан соң өлтүрүп салышкан. Булар "Ислам мамлекетинин" мүчөлөрү болгон. Алар бошоткула деген талапты койгон", — деп айтылат маалыматта.

Сүйлөшүүлөрдүн жүрүшүндө кылмышкерлердин өздөрү жаңдалдаша кетип, ал куралчан урушка айланган. Абак кызматкерлеринин тынчытуу аракетинен майнап чыккан эмес. Кылмышкерлер бычак жана башка буюмдарды колдонуп, түрмө кайтаруучуларына кол салып, бир нечесин жарадар кылышкан. Администрация абалды турукташтыруу үчүн чараларды көрүп, кылмышкерлер арасында адам курмандыктары болгон.

Аталган абакта 1500 кылмышкер камалып тургандыгы айтылган.

Буга чейин да Тажикстандын Кожент аймагында абакта чыккан козголоңдон түрмөдө отурган 13 киши каза болгону кабарланган. Анда да "Ислам мамлекетинин" мүчөлөрү болгону айтылган. Абакта отургандардын бири кароолчунун куралын тартып алып, ок чыгара баштаган. Козголоңчулар колониянын бир имаратын ээлеп алууга да үлгүргөн. Согду облусунун Ички иштер башкармалыгынын атайын кызматы окуяны баскан.