БИШКЕК, 22-май — Sputnik. Кыргыз-өзбек чек арасында 2018-жылдын жыйынтыгы боюнча мыйзам бузуулардын саны 2017-жылга салыштырмалуу 65 пайызга азайды. Муну эки өлкөнүн чек арачыларынын активдүү кызматташуусунун натыйжасы катары кароого болот. Бул туурасында Sputnik Өзбекстан Чек ара аскерлери Мамлекеттик коопсуздук кызматына таянуу менен билдирди.
Маалыматка ылайык, 21-майда Наманганда Кыргызстан менен Өзбекстандын чек ара кызматынын жыйыны өткөн. Жолугушууда чек ара коопсуздугу, 2018-жылдагы жалпы чектерди коргоо боюнча ишмердүүлүктүн жыйынтыгы жана 2019-жылдагы негизги иш пландары талкууланган.
Мындан сырткары, көйгөй жараткан маселелерди чечүү жаатында өткөрүлгөн жолугушуулар 2018-жылы 19,5 пайызга көбүрөөк болгону айтылат. Ошондой эле эки өлкө биргеликте чек арада жүргүзгөн күзөтүүлөр да 21 пайызга жогорулаган.
