БИШКЕК, 8-июн. — Sputnik. 9-июнда республиканын тоолуу райондорунда жана тоо этектеринде мезгил-мезгили менен жаан жаап, күн күркүрөшү, бийик тоолуу райондордо кар жаашы күтүлөт. Бул тууралуу Кыргызгидромет билдирди.
8-июнда Чүй облусунун тоолуу райондорунда жана тоо этектеринде, 9-10-июндарда Ош, Жалал-Абад, Баткен облустарынын тоолуу райондорунда жана тоо этектеринде ,10-июндан 12-июнга чейин Ысык-Көл облусунда жаан-чачын катуу жаашы күтүлөт. Батыштан соккон шамалдын ылдамдыгы секундасына 4-9 метрден кээ бир райондордо 15-20 метрге жетет. Абанын температурасы төмөндөйт.
Туруксуз аба ырайынан улам республиканын тоолуу жана тоо этектериндеги райондорунда сел жүрүшү мүмкүн.
Абанын температурасы Чүй жергесинде +21... +26, Таласта +23... +25 градус, Ысык-Көл жана Нарын облустарында +18... +23, ал эми Ош, Баткен жана Жалал-Абад аймагында +24... +29 градус жылуу болору айтылды.
Ош жана Бишкек шаарларында мезгил-мезгили менен нөшөрлүү жаан жаап, күндүн табы Ошто +26... +28, борбор калаада +24... +26 градус жылуу болот.
