Депутаттар Атамбаевди экс-президент макамынан ажыратуу боюнча комиссия түздү

БИШКЕК, 13-июн. — Sputnik. Жогорку Кеңештин депутаттары тарабынан Алмазбек Атамбаевди экс-президент макамынан ажыратуу үчүн ага каршы күнөө коюу боюнча комиссия түзүлдү.

Мындай чечимди Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин регламенти боюнча комитети сунуштады. Комиссия түзүү боюнча чечимди комитеттин төрагасы Канат Керезбеков окуду.

"ЖК депутаттарынын үчтөн биринин экс-президент макамынан ажыратуу үчүн экс-президент Алмазбек Атамбаевге каршы күнөө коюу жөнүндө демилгеси Жогорку Кеңештин кароосуна киргизилсин. Бул боюнча депутаттардан убактылуу комиссия түзүлсүн", — деген чечимди окуду Керезбеков.

Андан соң депутат Асел Кодуранова чыгып сөз сүйлөп, кесиптештерин мыйзамды сыйлоого чакырды.

"Регламент боюнча комиссия түзүү туура, бирок президентти кызматтан четтетүү боюнча берене бар, ал эми экс-президенттин кол тийбестигин алуу беренеси жок. Мыйзам менен кетсек ошол регламентке өзгөртүү киргизиш керек. Кандай иш-аракет жасасак да мыйзамдуу кылсак болмок. Эртең бул күндөр да өтөт, анан "колубуздан бурап ушундай чечим кабыл алдырган" дебеңиздер. Ушуну айтып коёюн, мыйзамсыз чечим кабыл алсак, эртең ким, кандай жооп берет? Ошону унутпагыла!" — деди Кодуранова.

Бул маселе боюнча андан башка бир дагы эл өкүлү үн каткан жок. Мындан улам дароо эле добуш берүүгө өтүп, 96 депутат макул, төртөө каршы деген добуш берди. Натыйжада Алмазбек Атамбаевди экс-президент макамынан ажыратуу үчүн күнөө коюу боюнча депутаттык комиссия түзүлдү. Алар 7 күндүн ичинде корутунду чыгаруу милдеттенмесин алды.