БИШКЕК, 26-июн. — Sputnik. Арыс шаарындагы жарылуудан каза тапкандардын саны үчкө жетти. Бул тууралуу өлкөнүн коргоо министринин орун басары Тимур Дандыбаевге таянуу менен Sputnik Казакстан агенттиги жазды.
Буга чейин кампада сакталган ок-дарынын жарылуусунан эки кишинин өлгөнү айтылган. Бири аскер адамы болсо, экинчиси жай тургун болчу.
25-июнда Шымкенттин ооруканаларынын биринде контракттык негизде аскер кызматын өтөп жаткан жоокер Нурлан Ахматовдун көз жумганы белгилүү болду.
"32 жаштагы жоокердин бир баласы бар болчу. Өзү шымкенттик эле. 2013-жылы аскердик милдетин өтөөгө чакырылып, бөлүмдүн командирлигин аркалап келген", — деди Дандыбаев.
Белгилей кетсек, жарылуу 24-июнь күнү саат 9.20ларда Казакстандын түштүгүндө жайгашкан Арыс шаарындагы №44856 аскер бөлүгүндөгү курал-жарак кампасында болгон. Элди ыкчам кызматтын адистери, ИИМ жана Коргоо министрлигинин өкүлдөрү эвакуациялаган.
Шаарда 43 миң киши жашайт. Облус акими Умирзак Шукеев башында турган жумушчу топ түзүлдү.
