ОШ, 15-июл. – Sputnik. Ош шаарында 9-марттан бери дайынсыз болуп жаткан 55 жаштагы кишинин сөөгү Кара-Суу районунун Жаңы-Арык айыл өкмөтүнүн Ак-Терек айылындагы сайдан табылды. Бул тууралуу шаардык милициянын маалымат кызматынын өкүлү Абсатар Тавакалов Sputnik Кыргызстан агенттигине билдирди.
Маалыматка ылайык, 2019-жылдын 27-мартында Ош шаарынын 60 жаштагы тургуну 55 жаштагы бир тууган иниси 18 күндөн бери табылбай жатканын айтып, милицияга кайрылган. Буга байланыштуу ыкчам топ издөө иштерине киришкен.
Натыйжада 55 жаштагы кишини өлтүрүүгө шектелип 30 жаштагы жаран кармалган. Ал өз көрсөтмөсүндө окуя А.С. аттуу кишинин Фабричная көчөсүндө жайгашкан үйүндө болгонун билдирген.
"Шектүүнүн айтымында, А.С. менен жээни сөз талаша кетип, уруша кетишкен. Натыйжада жээни таякесин бычак менен жүрөккө сайган. Көз жумган кишинин сөөгүн Кара-Суу районунун Ак-Терек айыл аймагындагы сайга экөөлөп көмүшкөнүн билдирген", — деп айтылат маалыматта.
Учурда тийиштүү экспертиза дайындалып, шектүү эки айга камакка алынды.
Ал эми таякесин өлтүрүүгө шектелген 36 жаштагы жээни Ош шаарында төрөлүп, Россиянын жараны экени белгилүү болду. Учурда аны кармап, Кыргызстанга алып келүү боюнча аракеттер жүрүп жатат.
