БИШКЕК, 22-июл. — Sputnik. Өкмөттүн Чүй облусундагы өкүлчүлүгүнүн аппарат жетекчиси Молдакун Абдылдаев үй-бүлөсү менен Суусамырда сууга түшүп кеткен жерге тосмолор орнотулбайт. Бул тууралуу Транспорт жана жолдор министрлигинин маалымат кызматы кабарлады.
Билдирүүгө ылайык, кырсык болгон Суусамыр айыл аймагынын Кожомкул менен Кызыл-Ой айылдарынын ортосунда жол белгилери бар.
"Ал жерде буга чейин жолчулар тарабынан тиешелүү жол белгилери орнотулган. Ал эми тосмолор жок болчу, каралган эмес. Шагыл жол болгондуктан тосмо орнотулбайт", — деп маалымат кызматы жооп узатты.
Эскерте кетсек, кырсык 30-июнда саат 9.30дар чамасында Жайыл районунун Кызыл-Ой менен Кожомкул айылынын ортосунда болгон. Унаада Абдылдаев, жубайы, уулу, небереси жана айдоочусу болгон. Эки күндөн кийин аткаминер менен айдоочусунун сөөгүн суудан алып чыгышкан. 4-июлда кечинде 8 жаштагы небересинин сөөгүн табышкан. Ал эми 10-июлда жубайы Тинатин Шадыканова табылса, уулу Илимбек Абдылдаевдин сөөгүн 14-июлда гана алып чыгышкан.
Издөө иштерин ӨКМдин 98 куткаруучусу менен кырсыктаган бүлөнүн 20дай тууганы жүргүзгөн.
