БИШКЕК, 1-авг. — Sputnik. Президент Сооронбай Жээнбеков Кыргызстанга иш сапары менен келген Өзбекстандын премьер-министри Абдулла Ариповду кабыл алганын өлкө башчынын маалымат кызматы билдирди.
Эскерте кетсек, коңшу өлкөнүн өкмөт башчысы Бишкекке 1-августта келген.
Жолугушууда Кыргызстан менен Өзбекстандын ортосундагы эки тараптуу кызматташтыкты мындан ары өнүктүрүү, анын ичинде чек ара, энергетика, аймактар жана парламенттер аралык кызматташуу маселелери талкууланды.
Сүйлөшүү учурунда Жээнбеков кыргыз-өзбек кызматташтыгын тереңдетүү өлкөнүн тышкы саясаты үчүн дайыма артыкчылыктуу багыт катары караларын билдирди.
"Президент бардык тиешелүү маселелер өз ара пайдалуу шарттарда чечилүүсү керектигин баса белгилеп, Өзбекстан менен эки тараптуу гана эмес, көп тараптуу кызматташууга да кызыкдар экендигин айтты. Ошондой эле кыргыз-өзбек чек арасын делимитациялоо боюнча тараптардын ишин канааттануу менен белгилеп, Кыргызстан жана Өзбекстандын чектеш аймактарынын ортосундагы кызматташуусун мындан ары тереңдетүү зарылдыгын кошумчалады", — деп айтылат билдирүүдө.
Маалыматта президенттер тарабынан белгиленген эки өлкө ортосундагы бардык маселелер, анын ичинде Кыргызстан менен Өзбекстандын соода жүгүртүүсүн бир миллиард долларга чейин жеткирүү боюнча да өкмөттүк деңгээлде иш жүргүзүлүп жатканы белгиленет.
