БИШКЕК, 11-сен. — Sputnik. Жогорку Кеңештин депутаты Евгения Строкова билим берүү жана илим министри кызматына талапкер Каныбек Исаковдун мектеп фонддорун жабам деген ою туура эмес экенин айтып, сынга алды.
Талкуу учурунда Исаков депутаттардын суроолоруна жооп берип жатып, эгер мамлекет мектептерди толук каржылай ала турган болсо фонддорду жоюу максатка ылайык боло турганын айткан болчу.
Строкова билим берүү министри коомдук фонддорду жаба албай турганын, "жаап салам" деп алдабаш керектигин айтып, фонддун ишмердиги башка мыйзамдар менен жөнгө салынарын билдирди.
"Фонддор болбосо билим тармагы өнүгө албайт, аны билим берүү министри, премьер-министр дагы моюнга алышы керек. Муну баары түшүнүп жатат", — деди ал.
Эл өкүлү фонддорду жоюп салса эле баары жакшы болуп кетпей турганын кошумчалады.
Строкова, андан сырткары, чет жакка барып эс алып жаткан директорлор, завучтар жана мугалимдер жалаң гана ата-энелердин акчасына барат деген жаңылыш түшүнүк экенин белгилеп өттү.
Биздин Telegram-каналга жазылыңыз.
