Баткендин чегинде 80 жыл мурун курулган мектептин ордуна жаңысы салына баштады

ОШ, 1-окт. – Sputnik. Баткен районунун Тажикстан менен чектешкен Орто-Боз жана Үч-Дөбө айылдарында орто мектептердин курулуш иштери башталды. Бул тууралуу жергиликтүү кабарчы билдирди.

Маалыматка ылайык, президенттин аппарат жетекчисинин орун басары Алманбет Салиев жана өкмөттүн Баткен облусундагы ыйгарым укуктуу өкүлү Акрам Мадумаров аталган мектептердин курулушуна капсула салышты.

Орто-Боз айылындагы Жолдошбай Момунов атындагы орто мектеп 1938-жылы ашар жолу менен курулуп, учурда авариялык абалга кептелген. Ал эми Үч-Дөбө айылындагы мектеп башталгыч класстар үчүн гана курулган. Жогорку класстар коңшу айылдагы мектептерге каттап окушат.

Үч-Дөбө айылындагы мектеп 225 орунга ылайыкташып, курулуш иштерине республикалык казынадан 35 миллион сом бөлүнгөн. Ал эми Орто-Боз айылындагы мектеп 150 орунга ылайыкташтырылып, ага 45 миллион сом каралган.

Эки мектептин имаратынын курулуш иштери 2020-жылдын сентябрь айында бүткөрүлүп, пайдаланууга берилмекчи.

Белгилей кетсек, чек аралаш аймактагы бул курулуштар өлкө башчысынын жеке көзөмөлүнө алынган.