БИШКЕК, 22-окт. — Sputnik. Борбор калаада хоккей боюнча биринчи ирет "Ак илбирстин кубогу" мелдеши өттү. Бул тууралуу ПРООНдун Кыргызстандагы байланыш боюнча бөлүмүнөн кабарлашты.
Турнир 21-22-октябрь күндөрү өттү. Шаардык муз аянтында "Алга-1", "Алга-2", "Алга-3", "Нарынские ястребы", "Кенешские пилоты" жана "КТЖ" командалары ат салышкан.
Спорттук иш-чаранын ачылышына Хоккей федерациясынын, Айлана-чөйрөнү коргоо жана токой чарбасы агенттигинин, ПРООНдун жана Спорт агенттигинин өкүлдөрү катышкан.
"Мелдештин максаты — ак илбирсти сактоого үндөө. Беттештерден тышкары көрүүчүлөр менен жаш спортчуларга викторина, аквагрим (бетке сүрөт тартуу — ред.) боюнча мастер-класс жана оюнчук ак илбирстер менен фотосессия уюштурулду", — деп айтылат маалыматта.
Маалыматта кыргызстандык хоккейчилер өлкөдөгү жана эл аралык чемпионаттарда "Ак илбирсти сактайлы" урааны менен катышып, аны коргоого үндөп келери айтылат.
Жыл сайын 23-октябрда Ак илбирстин эл аралык күнү белгиленип келет. 2013-жылы жаныбарды жана анын байырлаган жерин сактоо боюнча Бишкек декларациясы кабыл алынып, буга 12 мамлекет кол койгон.
