БИШКЕК, 25-окт. — Sputnik. Бишкек шаарынын тургунун жарым миллион сомго алдап кетти делген жаран Россиядан кармалды. Бул тууралуу КРдин Ички иштер министрлиги билдирди.
41 жаштагы киши эски редакциядагы Кылмыш жана жаза кодексинин 166-беренеси ("Алдамчылык") менен айыпталып, жоопкерчиликтен качып жүргөн.
"Ал жүк ташуучу автоунаа сатып алууну көздөгөн кишинин ишенимине кирип, алдоо жолу менен 545 миң сомун алып кеткен", — деп айтылат билдирүүдө.
Аны кыргызстандык жана россиялык укук коргоочулар Санкт-Петербург шаарында колго түшүрүп, учурда экстрадиция маселеси каралып жатат.
