БИШКЕК, 28-ноя. — Sputnik. Кыргызстандан бир жылда (2018-жылы) башка өлкөлөргө банк аркылуу 90,5 миллиард доллар, ал эми 2019-жылы алты айда 48,3 миллиард доллар которулган. Бул туурасында өкмөт башчы Мухаммедкалый Абылгазиев парламенттин жыйынында билдирди.
Депутат Таабалды Тиллаев журналисттик иликтөөдө айтылган Кыргызстандан чыгарылган 700 миллион доллар кимге тиешелүү экенин сурады.
"Бул бюджеттен уурдалган каражат эмес. Биздин оюбуз боюнча бизнестин акчасы. Анын кандай жол менен табылганын тастыктайбыз. Иликтеп жаткан органдар, депутаттык комиссия иштин жыйынтыгын чыгарсын. Кечээ угуп калдым, бир бизнесмен "Мен бир айда 200 миллион доллар которгом. Бүт документтерим бар, ушунун баарын айта берсеңер кандай болот?" деп айтып жатат. Кимдики легалдуу, кимдики контрабанда экенин такташыбыз керек", — деди Абылгазиев.
Буга чейин Финполдун башчысы Бакир Таиров Айэркен Саймаити жана аны менен иштешкен адамдар Кыргызстандан 932 миллион 736 миң доллар чыгарып кеткенин билдирген.
