БИШКЕК, 28-ноя. — Sputnik. Кыргызстандын президенти Сооронбай Жээнбеков ЖККУга мүчө өлкөлөрдүн президенттерин Конгресс-холлдун кире беришинен тосуп алды.
Биринчилерден болуп Армениянын премьер-министри Никол Пашинянды тосуп алышты. Андан соң Белоруссиянын президенти Александр Лукашенко, Казакстандын президенти Касым-Жомарт Токаев, Тажикстандын башчысы Эмомали Рахмон жана Россиянын лидери Владимир Путин келди.
Учурашып биргеликте сүрөткө түшкөндөн кийин тар чөйрөдөгү жыйын башталды. Мамлекет башчылары эл аралык жана аймактык коопсуздук көйгөйлөрүн, тажик-афган чек арасын бекемдөө жана уюмдун аскерий потенциалын өнүктүрүү маселелерин талкуулашат.
ЖККУга мүчө өлкөлөр — Армения, Белоруссия, Казакстан, Кыргызстан, Россия жана Тажикстан. Уюмдун негизги максаты — аталган биримдикке кирген өлкөнү тышкы саясий агрессиядан, эл аралык террорчулуктан жана жаратылыш кырсыктарынан сактоо.
