БИШКЕК, 23-фев. — Sputnik. Көк бөрү боюнча Ош жана Талас облусунун ынтымак беттеши өтүп, Талас районунун улакчылары баш байгеге ээ болду.
Оюндар 22-23-февраль күндөрү Ош шаарындагы Төлөйкөн ипподромунда өттү.
Посмотреть эту публикацию в Instagram
Эреже боюнча эки облустун төрт районунан сегиз команда түзүлүп, күч сынашкан. Натыйжада Оштун командалары финалга чыга алган жок. Ал эми Таластын Манас району төртүнчү, Бакай-Ата үчүнчү орунду ээледи. Талас району Кара-Бууранын командасын 1:0 эсеби менен жеңип, биринчи орунду алды.
Оюндардын байге фонду бир миллион сомду түзүп, баш байгени уткандарга 300 миң сом ыйгарылды.
Белгилей кетсек, ушундай эле ынтымак оюну былтыр 23-24-ноябрь күндөрү Таласта өткөн. Андан мурдараак Талас менен Чүй облусунун райондорунун ортосунда болгон.
