БИШКЕК, 9-мар. — Sputnik. Бишкек шаардык соту калаада 1-июлга чейин митингдерге тыюу салуу боюнча биринчи инстанциянын (райондук соттор) чечимин жокко чыгарды. Бул тууралуу ведомствонун маалымат кызматы билдирди.
Октябрь, Биринчи май жана Ленин райондук сотторунун район жетекчилигинин арызы боюнча чыгарып берген чечими күчүн жоготту. Ал эми Свердлов райондук администрациясы өз өтүнүчүн артка кайтарып алган эле.
Буга чейин Бишкек прокуратурасы мэриянын токтомун негизсиз деп, аны жокко чыгаруу боюнча шаардык сотко сунуш берген.
Ал эми мэрия 6-мартта маселени укуктук талаада кароо үчүн шаардык соттон райондук соттордун чечимдерин жокко чыгарууну суранганы жатканын билдирген.
