БИШКЕК, 11-мар. — Sputnik. Кыргызстанда коронавирустун таралышын алдын алуу максатында Бишкек шаарынын борбордук жана башка мечиттеринде дезинфекциялоо иштери башталды. Бул туурасында муфтияттын маалымат кызматынан кабарлашты.
Алгачкылардан болуп баш калаадагы борбордук мечитке сууга кошулмасы бар дары-дармек чачылган.
"Бишкек шаарында жалпы 68 мечит болсо алардын баары кезек-кезеги менен күнүнө эки жолу дезинфекцияланат", — деп жазылган маалыматта.
Эскерте кетсек, буга чейин КМДБ тарабынан өлкө аймагындагы казыят, хатибият, мечит, медресе жана окуу борборлоруна жума намаздарында, сабактарда коронавирустун алдын алуу жолдорун элге түшүндүрүү боюнча тапшырмалар берилген. Бүгүндөн тарта республикадагы бардык мечиттерде, диний окуу жайларда дезинфекциялоо иштери башталды.
Ал арада дүйнөнү кооптондуруп жаткан бул вирус менен күрөшүү жолдору каралууда. Британиялык окумуштуулар вакцина иштеп чыгуу үчүн акча алып коронавирус жуктурууга даяр ыктыярчыларды издөөдө.
