БИШКЕК, 29-мар. — Sputnik. Бишкекте медицина кызматкерлерин колдоо акциясы башталды. Анда шаардыктар кечинде балконго чыгып "Дарыгерлерге рахмат!" деп кыйкырып кол чабышууда.
Посмотреть эту публикацию в Instagram
Аталган акциянын уюштуруучулары кечээ, 28-мартта, кечинде тартылган видеону Instagram баракчасына жүктөдү.
"Достор, келгиле карантин убагында муңайып отурбайлы. Күн сайын кечки саат 21.00дө балконго чыгып кол чабууну сунуштайбыз. Медиктерибизди колдоп туралы", — деп жазылган видеонун алдына.
Акцияга өз үйүндө отурган бардык жарандар катыша алат. Уюштуруучулар ушундай жол аркылуу коронавирус менен күрөшүп жаткан дарыгерлерге ыраазычылык билдирип, дем-күч берүүнү көздөйт.
Эскерте кетсек, Кыргызстанда 58 адамдын коронавирус жуктурганы аныкталды. Алардын басымдуу бөлүгү Ош жана Жалал-Абад облустарында.
Бишкек, Ош, Жалал-Абад шаарлары менен Сузак, Кара-Суу, Ноокат райондоруна өзгөчө абал киргизилип, кечки саат 20:00дөн кийин көчөгө чыгууга тыюу салынган. Мындай режим 15-апрелге чейин уланат.
Ушу тапта өлкө ичинде абал кандай болуп жатканын Sputnik жүргүзгөн тексттик баяндамадан билүүгө болот.
