БИШКЕК, 4-апр. – Sputnik. Ош облусуна караштуу Кара-Суу районунан Сокулукка келген үч аялдан коронавируска анализ алынды. Бул тууралуу өкмөттүн Чүй облусундагы ыйгарым укуктуу өкүлү Алтынбек Намазалиев билдирди.
Анын айтымында, аялдар жүк ташыган бусик менен келишкен. Транспортту Сокулук районундагы Маловодное айылындагы постто турган күзөтчүлөр токтотушкан. Аялдардын жанында Кара-Суу районундагы айыл өкмөттөрүнүн биринен берилген маалым каты болгон. Милиция аларды жашаган жерине чейин коштоп барып үй карантининде болууга чакырышкан. Медиктер алардан анализ алышкан, жыйынтыгы азырынча чыга элек. Жергиликтүү бийликтин өкүлдөрү үйдү көзөмөлгө алышты, аймактык тергөөчү үй карантининин сакталышын көзөмөлдөп турат.
Намазалиевдин маалыматы боюнча аялдар Кара-Суу районунда катталган, бирок Чүй облусундагы айылдардын биринде жашашат.
“Өзгөчө абал режими кирген Кара-Суу районунан келип алган аялдардын аракетине юридикалык баа берилет”, - деди ыйгарым укуктуу өкүл.
Белгилей кетсек, Кыргызстанда 144 адам (77 аял, 67 эркек) коронавирус жуктурганы аныкталган. Тилекке каршы, вируска кабылган Ноокат районунун 61 жаштагы тургуну 2-апрелде көз жумду. Бул өлкө ичинде катталган алгачкы учур. 144 бейтап кайсы аймактарда экенин материалдан окуңуздар.
